Miklar endurbætur í FG

Miklar endurbætur voru gerðar á FG sumarið 2025

Miklar endurbætur voru gerðar á húsakynnum FG í sumar og eins og glöggir (eldri) nemendur hafa tekið eftir hafa hlutar hans tekið algerum stakkaskiptum.

Fyrst ber að nefna aðstöðu í matsölu nemenda, en þar þurfa á hverjum degi nokkur hundruð nemendur að fá næringu á rúmlega hálfri klukkustund. Það er meira en að segja það.

En í stuttu máli, þá er búið að henda gamla eldhúsinu og kaupa nýtt. ,,Þetta breytir bara öllu og nú erum við komin með eldhús og aðstöðu sem kannski dugar í einhverja áratugi,“ sagði Amita Niraula, sem rekur eldhúsið. ,,Mér líst mjög vel á þetta og þetta er bara frábært,“ bætti hún við glöð í bragði.

Einnig var sett upp nýtt brunavarnarkerfi í skólanum og þá hefur aðstaðan í Jógasalnum (F110) algerlega verið tekin í gegn og þar settur inn myndvarpi og fleira nýtt.

Einnig flæddi líka stundum inn í það rými og nú er búið að ganga svo frá að það á ekki að gerast. En eins og nemendur vita, þá rennur lítill lækur fram hjá FG, sem getur breyst í litla á, þegar vel rignir. Sem stundum gerist. Nú eiga öll vandamál tengd því að vera úr sögunni.

Þá var líffræðistofan algerlega tekin í gegn og er í raun um nýja stofu að ræða. Bætir þetta mjög aðstöðu til kennslu í líffræði.

En allt kostar þetta peninga og óhætt að segja að búið sé að endurnýja FG fyrir nokkra tugi milljóna króna. Þessi kostnaður er greiddur af íslenskra ríkinu, enda flestir menntaskólar reknir á vegum þess. Það er því mun betri FG, en var, sem hefur tekið á móti nemendum þessa haustönnina.