Fréttir

NFFG hélt fyrir skömmu styrktarbingó í Urðarbrunni, þar sem söfnuðust um 150.000 kónur, sem runnu óskiptar til Pieta-samtakanna. Þau stuðla að forvörnum gegn sjálfsvígum. Félagslíf nemenda hefur verið með nokkrum ágætum undanfarið, þrátt fyrir kóvid. Hélt NFFG til að mynda ágætlega lukkað keilukvöld fyrr í mánuðinum, þar sem um 50 manns tóku þátt. Kennslu fyrir jól lauk í FG þann 15.desember, en námsmatsdagar eru þann 16. og 17.desember. Kennsla hefst svo aftur mánudaginn 3.janúar samkvæmt stundaskrá. Gleðilega hátíð og gleðilegt nýtt ár!

Við innganginn í FG hefur undanfarin misseri verið rekið lítið myndistargallerí sem heitir ,,Fgalleríið". Þar eru einmitt til sýnis núna sjálfsmyndir frá nokkrum nemendum í áfanganum MYND3mf05. Þær eru unnar með dúkristutækni, að sögn Stefáns Jónssonar, myndlistarkennara.

Það var líf og fjör þegar hvuttarnir Birna, Frosti og Chico stóðu fyrir ,,hundastund"/ ,,hvuttahitting" í FG í dag, en Auður og Dagný námsráðgjafar stóðu fyrir þessu. Nálægð við dýr gerir öllum gott, en þetta er í annað skiptið sem þetta er haldið í FG, hið fyrsta var í fyrra. Skemmtilegt.

Óhætt er að segja að leiklistarlífið í FG blómstri, þrátt fyrir kóvid og allt, en FG vann fyrir skömmu spunakeppnina "Leiktu betur" í þriðja sinn í röð. Liðið er því ósigrað í spuna síðan 2019 og geri aðrir skólar betur. Það var Hitt húsið sem stóð að keppninni, en hún er opin öllum framhaldsskólum á landinu. Hreint út sagt frábær árangur og sigurgleðin leynir sér ekki meðal FG-inga á myndinni sem fylgir með.

Brautskráning nemenda frá FG fyrir haustönn 2021 fór fram í Urðarbrunni föstudaginn 19.nóvember.´Það var Solveig Þóra Þorsteinsdottir sem varð dúx að þessu sinni, en hún stundaði nám á íþróttabraut. Af þeim 38 sem útskrifuðust að þessu sinni voru 12 af hönnunar og markaðsbraut, sex voru af viðskiptabrautum, fimm af listnámsbrautum, fjórir voru af bæði félagsvísindabraut og íþróttabraut, þrír voru af bæði alþjóðabrautum og náttúrufræðibraut, og einn brautskráðist með lokapróf frá FG. Það kom svo í hlut Salnýjar Kaju Sigurgeirsdóttur að flytja ávarp nýstúdents, en athöfninni var streymt á YouTube vegna sóttvarnaraðgerða og því færri í Urðarbrunni en verið hefði við eðlilegar aðstæður.

Nú er haustönn 2021 að ljúka í FG, en í dag, á morgun og miðvikudag standa yfir próf. Birting einkunna er svo næstkomandi föstudag, 5.nóvember kl. 11.00. Þær birtast á INNU. Prófasýning verður sama dag frá 11.30-12.30. Brautskráning fer fram í Urðarbrunni föstudaginn 19.nóvember kl. 15.00.

Það er alltaf gaman að segja frá því þegar fyrrum nemendum okkar gengur vel. Það er einmitt raunin með tískuhönnuðinn Sólveigu Dóru Hafsteinsdóttur, sem hóf feril sinn hér í FG í fatahönnun. Rætt var við hana fyrir skömmu í Dagmálum Morgunblaðsins, en þar segir að Dóra sé ...,,ný­út­skrifuð úr meist­ara­námi í ein­um virt­asta hönn­un­ar­skóla heims, Central Saint Mart­ins í London, og hef­ur út­skrift­ar­lína henn­ar úr skól­an­um hlotið verðskuldaða at­hygli um all­an heim." Sól­veig fékk aðal­verðlaun út­skrift­ar­nema fyr­ir lín­una. Vel gert!

Nemendum í Fjölmiðlafræði hjá Gunnari Hólmsteini bauðst þann 21.október síðastliðinn það tækifæri að skreppa í heimsókn á Stöð2. Fyrirtækið er með höfuðstöðvar á Suðurlandsbraut og þar tók fréttastjóri Stöðvar 2, Visis og Bylgjunnar, Kolbeinn Tumi Daðason, á móti hópnum. Var heimsóknin afar skemmtileg og áhugaverð og fékk hópurinn meðal annars að sjá atriði úr þættinum Stóra sviðið, sem var frumsýndur daginn eftir. Þá voru Auddi, Steindi og Gillz að taka upp í einu myndveranna, en rúsinan í pylsuendanum var svo að hitta RAX, Ragnar Axelsson, en hann er einn besti fréttaljósmyndari landsins og vinnur nú hjá Sýn/Stöð2.

Settur hefur verið upp hópur á fésbókinni fyrir foreldra nemenda í FG. Síðan á að þjóna þeim tilgangi að koma upplýsingum til foreldra um skólastarfið og eins til að stuðla að góðum samskiptum, sem og að skiptast á hugmyndum. Þeir sem vilja vera með fara inn á þessa síðu og biðja um aðgang. Hvetjum við foreldra til þess að gera það.

Þær Dagmar Íris Hafsteinsdóttir og Birna Berg Bjarnadóttir, nemendur á viðskiptabraut í FG, eru nýkomnar frá Finlandi ásamt kennaranum sínum Tinnu Ösp Arnardóttur, þar sem þær tóku þátt í frumkvöðlabúðum ásamt nemendum frá fjórum öðrum framhaldsskólum, frá Noregi, Hollandi, Þýskalandi og Finnlandi. Heimsóknin var liður í Erasmus Evrópuverkefninu “Sustainability in the Rural Areas”, sem FG leiðir ásamt samstarfsskólum í áðurnefndum Evrópulöndum.