Sprækur lækur uppfærður

Lækurinn spræki fær uppfærslu (t.h.).

Einhverjir sem lesa þessar línur hafa kannski einhvern tímann heyrt máltækið ,,að vera sprækur sem lækur“. En litli lækurinn sem rennur fram hjá FG, Arnarneslækurinn, getur orðið verulega sprækur á vorin og getur þá í raun breyst í litla, en kraftmikla á.

Og þetta hefur verið til nokkurra vandræða fyrir skólann þar sem lekið hefur inn í hann vegna vatnavaxta. Þetta hefur kostað skólann (íslenska ríkið) slatta af ,,kass.“ Á þessu ári voru gerðar miklar endurbætur á neðstu hæð FG og til dæmis jógasalurinn algerlega tekinn í gegn, meðal annars til að hindra leka þangað inn.

Undanfarna daga hafa svo verið litlar, en sprækar vinnuvélar við skólann, sem eru einfaldlega að breyta farvegi Arnarneslæksins, allt með það að markmiði að leki inn í skólann heyri sögunni til og lækurinn spræki láti það vera að lauma sé inn í FG.

En það eru fleiri sem eru sprækir en lækurinn, því sprækasta ball ársins í FG verður haldið fimmtudagskvöldið 4.desember næstkomandi. Við erum auðvitað að tala um hið margfræga Salsaball. Þar verður einvalalið; Jói Pé og Króli (Jói er stúdent frá FG), Sturla Atlas, DJ Dóra Júlía og fleiri.

Svo er listadeildin líka mjög spræk á köflum og já bara yfirleitt, og nú stendur yfir lítil sýning á vegum hennar í FG Gallery, þar sem æðarfugl er í aðalhlutverki. Um er að ræða blika (karldýrið) en sá sem er til sýnis er reyndar ekkert sérlega sprækur, því hann er dauður, uppstoppaður. Lítið líf í honum, en fallegur er hann og sýningin hjá TEIK2tg05 skemmtileg, með fínum teikningum.

Við hlið blikans má svo sjá eintak af fornum LM Ercisson skífusíma, sem voru algengir á síðustu öld, en teljast nú til safngripa og þykja mjög svalir.